jalaa ke mishal e jaan ham junoon sifaat chale

Jalaa ke mish.al-e-jaan ham junoon-sifaat chale Jo ghar ko aag lagaa.e hamaare saath chale Dayaar-e-shaam nahin manzil-e-sahar bhee nahin 'ajab nagar hai yahaan din chale na raat chale Hamaare lab na sahee wo dahaan-e-zakhm sahee Vaheen pahunchtee hai yaaro kaheen se baat chale Sutoon-e-daar pe rakhte chalo saron ke charaagh Jahaan talak ye sitam kee siyaah raat chale Huaa asiir koi ham-navaa to duur talak Ba-paas-e-tarz-e-navaa ham bhee saath saath chale Bachaa ke laa.e ham ai yaar phir bhee naqd-e-wafa Agarche luTte rahe rahzanon ke haath chale Phir aa.ee fasl ki maanind barg-e-aavaara Hamaare naam gulon ke muraaslaat chale Qataar-e-sheesha hai yaa kaarvaan-e-ham-safaraan Khiraam-e-jaam hai yaa jaise kaa.enaat chale Bhulaa hee baiThe jab ahl-e-haram to ai 'majrooh' Baghal men ham bhee liye ik sanam kaa haath chale