jalva e gul kaa sabab diida e tar hai ki nahiin

Jalva-e-gul kaa sabab deeda-e-tar hai ki nahin Meree aahon se bahaaraan kee sahar hai ki nahin Raah-e-gum-karda huun kuchh us ko khabar hai ki nahin Us kee palkon pe sitaaron kaa guzar hai ki nahin Dil se miltee to hai ik raah kaheen se aa kar Sochtaa huun ye tiree raahguzar hai ki nahin Tez ho dast-e-sitam de bhee sharaab ai saaqee Tegh gardan pe sahee jaam sipar hai ki nahin Main jo kahtaa thaa so ai rahbar-e-kotaah-khiraam Teree manzil bhee miree gard-e-safar hai ki nahin Ahl-e-taqdeer ye hai mojaza-e-dast-e-amal Jo khazaf main ne uThaayaa wo guhar hai ki nahin Dekh kaliyon kaa chaTaknaa sar-e-gulshan sayyaad Sab kee aur sab se judaa apnee Dagar hai ki nahin Ham rivaayaat ke munkir nahin lekin 'majrooh' Zamzama-sanj miraa khoon-e-jigar hai ki nahin