mujh se kahaa jibriil e junoon ne ye bhi vahi e ilaahii hai
— Majrooh Sultanpuri
Mujh se kahaa jibreel-e-junoon ne ye bhee vahi-e-ilaahee hai
Maz.hab to bas maz.hab-e-dil hai baaqee sab gumraahee hai
Wo jo hue firdaus-badar taqseer thee wo aadam kee magar
Meraa azaab-e-dar-badree meree naa-karda-gunaahee hai
Sang to koee baDh ke uThaao shaakh-e-samar Kuch duur naheen
Jis ko bulandee samjhe ho un haathon kee kotaahee hai
Phir koee manzar phir vahee gardish kya kiije ai koo-e-nigaar
Mere liye zanjeer-e-guloo meree aavaara-nigaahee hai
Bahr-e-khuda khaamosh raho bas dekhte jaao ahl-e-nazar
Kya laghzeeda-qadam hain us ke kya duzdeeda-nigaahee hai
Diid ke qaabil hai to sahee 'majrooh' tiree mastaana-ravee
Gard-e-havaa hai rakht-e-safar raste kaa shajar ham-raahee hai