wo to gaya ye diida e Khoon baar dekhiye
— Majrooh Sultanpuri
Wo to gaya ye deeda-e-khoon-baar dekhiye
Daaman pe rang-e-pairahan-e-yaar dekhiye
Dikhlaa ke wo to le bhee gaya shokhi-e-khiraam
Ab tak hain raqs men dar o deevaar dekhiye
Uktaa ke ham ne toDee thee zanjeer-e-naam-o-nang
Ab tak fazaa men hai vahee jhankaar dekhiye
Siine men chhup gaya hai tuloo-e-sahar ke saath
Ab shaakh-e-dil pe wo gul-e-rukhsaar dekhiye
Barq-e-tapeeda baad-e-sabaa shola aur ham
Hain kaise kaise us ke giraftaar dekhiye
Pahle bhee tez-rau the par us dil-nasheen ke saath
Ye chashm-e-nam ye masti-e-raftaar dekhiye
'majrooh' ke labon se ye khushboo na jaa sakee
Bakhshee jo us ne daulat-e-bedaar dekhiye