wo jo chhup jaate the kaabon men sanam khaanon men

Wo jo chhup jaate the ka.abon men sanam-khaanon men Un ko laa laa ke biThaayaa gaya deevaanon men Fasl-e-gul hotee thee kya jashn-e-junoon hota thaa Aaj Kuch bhee naheen hota hai gulistaanon men Aaj to talkhee-e-dauraan bhee bahut halkee hai Ghol do hijr kee raaton ko bhee paimaanon men Aaj tak tanz-e-mohabbat kaa asar baaqee hai Qahqahe goonjte phirte hain bayaabaanon men Vasl hai un kee adaa hijr hai un kaa andaaz Kaun saa rang bharoon ishq ke afsaanon men Shahr men dhuum hai ik sho.ala-navaa kee 'makhdoom' Tazkire raston men charche hain paree-khaanon men