ye kaun aataa hai tanhaaiyon men jaam liye

Ye kaun aataa hai tanhaa.iyon men jaam liye Jilau men chaandnee raaton kaa ehtimaam liye ChaTak rahee hai kisee yaad kee kalee dil men Nazar men raqs-e-bahaaraan kee sub.h-o-shaam liye Hujoom-e-baadaa-o-gul men hujoom-e-yaaraan men Kisee nigaah ne jhuk kar mire salaam liye Kisee khayaal kee khushboo kisee badan kee mahak Dar-e-qafas pe khaDee hai sabaa payaam liye Mahak mahak ke jagaatee rahee naseem-e-sahar Labon pe yaar-e-maseehaa-nafas kaa naam liye Bajaa raha thaa kaheen duur koee shahnaa.ee UThaa hoon aankhon men ik khvaab-e-naa-tamaam liye