faqiiraana aae sadaa kar chale

Faqeeraana aa.e sadaa kar chale Ki myaan khush raho ham duaa kar chale Jo tujh bin na jiine ko kahte the ham So is ahd ko ab wafa kar chale Shifaa apnee taqdeer hee men na thee Ki maqdoor tak to davaa kar chale PaDe aise asbaab paayaan-e-kaar Ki naa-chaar yuun jee jalaa kar chale Wo kya chiiz hai aah jis ke liye Har ik chiiz se dil uThaa kar chale Koi naa-umeedaana karte nigaah So tum ham se munh bhee chhupaa kar chale Bahut aarzoo thee galee kee tiree So yaan se lahoo men nahaa kar chale Dikhaa.ee diye yuun ki be-khud kiyaa Hamen aap se bhee judaa kar chale Jabeen sajda karte hee karte ga.ee Haq-e-bandagee ham adaa kar chale Parastish kee yaan tak ki ai but tujhe Nazar men sabhon kee khuda kar chale JhaDe phuul jis rang gulbun se yuun Chaman men jahaan ke ham aa kar chale Na dekhaa gham-e-dostaan shukr hai Hameen daagh apna dikhaa kar chale Ga.ee umr dar-band-e-fikr-e-ghazal So is fan ko aisa baDaa kar chale Kahen kya jo poochhe koi ham se 'meer' Jahaan men tum aa.e the kya kar chale