jis sar ko guruur aaj hai yaan taaj varii kaa

Jis sar ko ghuroor aaj hai yaan taaj-varee kaa Kal us pe yaheen shor hai phir nauhagaree kaa Sharminda tire rukh se hai rukhsaar paree kaa Chaltaa nahin Kuch aage tire kabk-e-daree kaa Aafaaq kee manzil se gaya kaun salaamat Asbaab luTaa raah men yaan har safaree kaa Zindaan men bhee shorish na ga.ee apne junoon kee Ab sang mudaavaa hai is aashufta-saree kaa Har zakhm-e-jigar daavar-e-mahshar se hamaaraa Insaaf-talab hai tiree bedaad-garee kaa Apnee to jahaan aankh laDee phir vaheen dekho Aa.eene ko lapkaa hai pareshaan-nazaree kaa Sad mausam-e-gul ham ko tah-e-baal hee guzre Maqdoor na dekhaa kabhoo be-baal-o-paree kaa Is rang se jhamke hai palak par ki kahe too TukDaa hai miraa ashk aqeeq-e-jigaree kaa Kal sair kiyaa ham ne samundar ko bhee jaa kar Thaa dast-e-nigar panja-e-mizhgaan kee taree kaa Le saans bhee aahista ki naazuk hai bahut kaam Aafaaq kee is kaargah-e-sheeshagaree kaa Tuk 'meer'-e-jigar-sokhta kee jald khabar le Kya yaar bharosaa hai charaagh-e-saharee kaa