yaaro mujhe muaaf rakho main nashe men hoon
— Meer Taqi Meer
Yaaro mujhe muaaf rakho main nashe men hoon
Ab do to jaam khaalee hee do main nashe men hoon
Ek ek qurt daur men yuun hee mujhe bhee do
Jaam-e-sharaab pur na karo main nashe men hoon
Mastee se darhamee hai miree guftugoo ke biich
Jo chaaho tum bhee mujh ko kaho main nashe men hoon
Yaa haathon haath lo mujhe maanind-e-jaam-e-mai
Yaa thoDee duur saath chalo main nashe men hoon
Ma.azoor hoon jo paanv miraa be-tarah paDe
Tum sargiraan to mujh se na ho main nashe men hoon
Bhaagee namaaz-e-juma to jaatee nahin hai Kuch
Chaltaa hoon main bhee Tuk to raho main nashe men hoon
Naazuk-mizaaj aap qayaamat hain 'meer' jee
Juun sheesha mere munh na lago main nashe men hoon