afsos ki dandaan kaa kiyaa rizq falak ne
— Mirza Ghalib
Afsos ki dandaan kaa kiyaa rizq falak ne
Jin logon kee thee dar-khur-e-aqd-e-guhar angusht
Kaafee hai nishaanee tiraa chhalle kaa na denaa
Khaalee mujhe dikhlaa ke ba-vaqt-e-safar angusht
Likhtaa huun 'asad' sozish-e-dil se sukhan-e-garm
Taa rakh na sake koee mire harf par angusht
Jaataa huun jidhar sab kee uThe hai udhar angusht
Yak-dast jahaan mujh se phiraa hai magar angusht
Mizhgaan kee mohabbat men jo angusht-numaa huun
Lagtee hai mujhe tiir ke maanind har angusht
Har ghuncha-e-gul soorat-e-yak-qatra-e-khoon hai
Dekhaa hai kisoo kaa jo hinaa-basta sar-e-angusht
Garmee hai zabaan kee sabab-e-sokhtan-e-jaan
Har sham' shahaadat ko hai yaan sar-basar angusht
Khuun dil men jo mere naheen baaqee to 'ajab kyaa
Juun maahee-e-be-aab taDaptee hai har angusht
Shokhee tiree kah detee hai ahvaal hamaaraa
Raaz-e-dil-e-sad-paara kee hai parda dar-e-angusht
Kis rutba men baareekee-o-narmee hai ki juun gul
Aatee naheen panja men bas is ke nazar angusht
Main ulfat-e-mizhgaan men jo angusht numaa huun
Lagtee hai mujhe tiir ke maanind har angusht