dil e naadaan tujhe huaa kyaa hai

Dil-e-naadaan tujhe huaa kyaa hai Aakhir is dard kee davaa kyaa hai Ham hain mushtaaq aur vo be-zaar Yaa ilaahee ye maajraa kyaa hai Main bhee munh men zabaan rakhtaa huun Kaash poochho ki mudda.aa kyaa hai Jab ki tujh bin naheen koee maujood Phir ye hangaama ai khudaa kyaa hai Ye paree-chehra log kaise hain Ghamza o ishva o adaa kyaa hai Shikan-e-zulf-e-ambareen kyuun hai Nigah-e-chashm-e-surma saa kyaa hai Sabza o gul kahaan se aa.e hain Abr kyaa chiiz hai havaa kyaa hai Ham ko un se vafaa kee hai ummeed Jo naheen jaante vafaa kyaa hai Haan bhalaa kar tiraa bhalaa hogaa Aur darvesh kee sadaa kyaa hai Jaan tum par nisaar kartaa huun Main naheen jaantaa duaa kyaa hai Main ne maanaa ki kuchh naheen 'ghaalib' Muft haath aa.e to buraa kyaa hai