ek jaa harf e vafaa likkhaa thaa so bhii mit gayaa

Ek jaa harf-e-vafaa likkhaa thaa so bhee miT gayaa Zaahiran kaaghaz tire khat kaa ghalat-bar-daar hai Jee jale zauq-e-fanaa kee naa-tamaamee par na kyuun Ham naheen jalte nafas har chand aatish-baar hai Aag se paanee men bujhte vaqt uThtee hai sadaa Har koee darmaandagee men naale se naa-chaar hai Hai vahee bad-masti-e-har-zarra kaa khud 'uzr-khvaah Jis ke jalve se zameen taa aasmaan sarshaar hai Mujh se mat keh too hamen kahtaa thaa apnee zindagee Zindagee se bhee miraa jee in dinon be-zaar hai Aankh kee tasveer sar-naame pe kheenchee hai ki taa Tujh pe khul jaave ki is ko hasrat-e-deedaar hai Bis ki hairat se zi-paa uftaada-e-zinhaar hai Naakhun-e-angusht-e-but khaal-e-lab-e-beemaar hai Zulf se shab darmiyaan daadan naheen mumkin daregh Varna sad-mahshar ba-rehn-e-saafee-e-rukhsaar hai Dar-khayaal aabaad saudaa-e-sar-e-mizhgaan-e-dost Sad-rag-e-jaan jaada-aasaa vaqf-e-nashtar-zaar hai Bas-ki veeraanee se kufr-o-deen hue zer-o-zabar Gard-e-sahraa-e-haram taa-koocha-e-zunnaar hai Ai sar-e-shoreeda naaz-e-'ishq va paas-e-aabroo Yak taraf saudaa va yaksoo minnat-e-dastaar hai Vasl men dil intizaar-e-turfa rakhtaa hai magar Fitna taaraaj-e-tamannaa ke liye darkaar hai Khaanmaan-haa paa.emaal-e-shokhee-e-daa've 'asad' Saaya-e-deevaar sailaab-e-dar-o-deevaar hai