gar na andoh e shab e furqat bayaan ho jaaegaa

Gar na andoh-e-shab-e-furqat bayaan ho jaa.egaa Be-takalluf daagh-e-mah mohr-e-dahaan ho jaa.egaa Zohra gar aisa hee shaam-e-hijr men hotaa hai aab Partav-e-mahtaab sail-e-khaanumaan ho jaa.egaa Le to luun sote men us ke paanv kaa bosa magar Aisee baaton se vo kaafir bad-gumaan ho jaa.egaa Dil ko ham sarf-e-vafaa samjhe the kyaa maa'loom thaa Yaa'nee ye pahle hee nazr-e-imtihaan ho jaa.egaa Sab ke dil men hai jagah teree jo too raazee huaa Mujh pe goyaa ik zamaana mehrbaan ho jaa.egaa Gar nigaah-e-garm farmaatee rahee taaleem-e-zabt Sho'la khas men jaise khuun rag men nihaan ho jaa.egaa Baagh men mujh ko na le jaa varna mere haal par Har gul-e-tar ek chashm-e-khoon-fishaan ho jaa.egaa Vaa.e! gar meraa tiraa insaaf mahshar men na ho Ab talak to ye tavaqqo' hai ki vaan ho jaa.egaa Faa.eda kyaa soch aakhir too bhee daanaa hai 'asad' Dostee naadaan kee hai jee kaa ziyaan ho jaa.egaa Gar vo mast-e-naaz devegaa salaa-e-'arz-e-haal Khaar-e-gul bahr-e-dahaan-e-gul zabaan ho jaa.egaa Gar shahaadat aarzoo hai nashshe men gustaakh ho Baal sheeshe kaa rag-e-sang-e-fasaan ho jaa.egaa