hazaaron khvaahishen aisii ki har khvaahish pe dam nikle

Hazaaron khvaahishen aisee ki har khvaahish pe dam nikle Bahut nikle mire armaan lekin phir bhee kam nikle Dare kyuun meraa qaatil kyaa rahegaa us kee gardan par Vo khuun jo chashm-e-tar se umr bhar yuun dam-ba-dam nikle Nikalnaa khuld se aadam kaa sunte aa.e hain lekin Bahut be-aabroo ho kar tire kooche se ham nikle Bharam khul jaa.e zaalim tere qaamat kee daraazee kaa Agar is turra-e-pur-pech-o-kham kaa pech-o-kham nikle Magar likhvaa.e koee us ko khat to ham se likhvaa.e Huee sub.h aur ghar se kaan par rakh kar qalam nikle Huee is daur men mansoob mujh se baada-aashaamee Phir aayaa vo zamaana jo jahaan men jaam-e-jam nikle Huee jin se tavaqqo' khastagee kee daad paane kee Vo ham se bhee ziyaada khasta-e-tegh-e-sitam nikle Mohabbat men naheen hai farq jiine aur marne kaa Usee ko dekh kar jiite hain jis kaafir pe dam nikle Kahaan mai-khaane kaa darvaaza 'ghaalib' aur kahaan vaa.iz Par itnaa jaante hain kal vo jaataa thaa ki ham nikle