ye na thii hamaarii qismat ki visaal e yaar hotaa

Ye na thee hamaaree qismat ki visaal-e-yaar hotaa Agar aur jiite rahte yahee intizaar hotaa Tire va.ade par jiye ham to ye jaan jhuuT jaanaa Ki khushee se mar na jaate agar e'tibaar hotaa Tiree naazukee se jaanaa ki bandhaa thaa ahd bodaa Kabhee too na toD saktaa agar ustuvaar hotaa Koee mere dil se poochhe tire teer-e-neem-kash ko Ye khalish kahaan se hotee jo jigar ke paar hotaa Ye kahaan kee dostee hai ki bane hain dost naaseh Koee chaarasaaz hotaa koee gham-gusaar hotaa Rag-e-sang se Tapaktaa vo lahoo ki phir na thamtaa Jise gham samajh rahe ho ye agar sharaar hotaa Gham agarche jaan-gusil hai pa kahaan bachen ki dil hai Gham-e-ishq gar na hotaa gham-e-rozgaar hotaa Kahoon kis se main ki kyaa hai shab-e-gham buree balaa hai Mujhe kyaa buraa thaa marnaa agar ek baar hotaa Hue mar ke ham jo rusvaa hue kyuun na gharq-e-dariyaa Na kabhee janaaza uThtaa na kaheen mazaar hotaa Use kaun dekh saktaa ki yagaana hai vo yaktaa Jo duee kee boo bhee hotee to kaheen do-chaar hotaa Ye masaa.il-e-tasavvuf ye tiraa bayaan 'ghaalib' Tujhe ham valee samajhte jo na baada-khvaar hotaa