kabhi to aisa bhi ho raah bhuul jaon main
— Mohammad Alvi
Kabhee to aisa bhee ho raah bhuul jaa.oon main
Nikal ke ghar se na phir apne ghar men aa.uun main
Bikher de mujhe chaaron taraf khalaaon men
Kuch is tarah se alag kar ki juD na paa.oon main
Ye jo akele men parchhaa.iyaan see bantee hain
Bikhar hee jaa.engee lekin kise dikhaa.oon main
Miraa makaan agar biich men na aa.e to
In oonche oonche makaanon ko phaand jaa.oon main
Gavaahee detaa vahee meree be-gunaahee kee
Wo mar gaya to use ab kahaan se laa.oon main
Ye zindagee to kaheen khatm hee naheen hotee
Ab aur kitne dinon ye azaab uThaa.oon main
Ghazal kahee hai koee bhaang to naheen pee hai
Mushaa.ere men tarannum se kyuun sunaa.oon main
Are wo aap ke deevaan kya hue 'alvee'
Bike na hon to kabaaDee ko saath laa.oon main