agar gaflat se baaz aayaa jafaa ki

Agar ghaflat se baaz aayaa jafaa kee Talaafee kee bhee zaalim ne to kya kee Mare aaghaaz-e-ulfat men ham afsos Use bhee rah ga.ee hasrat jafaa kee Kabhi insaaf hee dekhaa na deedaar Qayaamat aksar us koo men raha kee Falak ke haath se main jaa chhupoon gar Khabar laa de koi tahtus-saraa kee Shab-e-vasl-e-adoo kya kya jalaa hoon Haqeeqat khul ga.ee roz-e-jazaa kee Chaman men koi us koo se na aayaa Ga.ee barbaad sab mehnat sabaa kee Kushaad-e-dil pe baandhee hai kamar aaj Nahin hai khairiyat band-e-qabaa kee Kiyaa jab iltifaat us ne zaraa saa PaDee ham ko husool-e-mudda.aa kee Kahaa hai ghair ne tum se miraa haal Kahe detee hai bebaakee adaa kee Tumhen shor-e-fughaan se mere kya kaam Khabar lo apnee chashm-e-surma-saa kee Diyaa ilm o hunar hasrat-kashee ko Falak ne mujh se ye kaisee daghaa kee Gham-e-maqsad-rasee taa naza.a aur ham Ab aa.ee maut bakht-e-naa-rasaa kee Mujhe ai dil tiree jaldee ne maaraa Nahin taqseer us der-aashnaa kee Jafaa se thak ga.e to bhee na poochhaa Ki too ne kis tavaqqo par wafa kee Kahaa us but se martaa hoon to 'momin' Kahaa main kya karoon marzee khuda kee