dafn jab khaak men ham sokhta saamaan honge

Dafn jab khaak men ham sokhta-saamaan honge Fils maahee ke gul-e-sham-e-shabistaan honge Naavak-andaaz jidhar deeda-e-jaanaan honge Neem-bismil ka.ee honge ka.ee be-jaan honge Taab-e-nazzaara nahin aa.ina kya dekhne duun Aur ban jaa.enge tasveer jo hairaan honge Too kahaan jaa.egee Kuch apna Thikaanaa kar le Ham to kal khvaab-e-adam men shab-e-hijraan honge Naasehaa dil men too itnaa to samajh apne ki ham Laakh naadaan hue kya tujh se bhee naadaan honge Kar ke zakhmee mujhe naadim hon ye mumkin hee nahin Gar wo honge bhee to be-vaqt pashemaan honge Ek ham hain ki hue aise pashemaan ki bas Ek wo hain ki jinhen chaah ke armaan honge Ham nikaalenge sun ai mauj-e-havaa bal teraa Us kee zulfon ke agar baal pareshaan honge Sabr yaa rab miree vahshat kaa paDegaa ki nahin Chaara-farmaa bhee kabhi qaidi-e-zindaan honge Minnat-e-hazrat-e-eesaa na uThaa.enge kabhi Zindagee ke liye sharminda-e-ehsaan honge Tere dil-tafta kee turbat pe adoo jhooTaa hai Gul na honge sharar-e-aatash-e-sozaan honge Ghaur se dekhte hain tauf ko aahu-e-haram Kya kahen us ke sag-e-koocha ke qurbaan honge Daagh-e-dil niklenge turbat se miree juun laala Ye wo akhgar nahin jo khaak men pinhaan honge Chaak parde se ye ghamze hain to ai parda-nasheen Ek main kya ki sabhee chaak-e-garebaan honge Phir bahaar aa.ee vahee dasht-navardee hogee Phir vahee paanv vahee khaar-e-mugheelaan honge Sang aur haath vahee wo hee sar o daagh-e-junoon Wo hee ham honge vahee dasht o bayaabaan honge Umr saaree to kaTee ishq-e-butaan men 'momin' Aakhiree vaqt men kya khaak musalmaan honge