huii taasiir aah o zaarii ki

Huee taaseer aah-o-zaaree kee Rah ga.ee baat be-qaraaree kee Shikva-e-dushmani karen kis se Vaan shikaayat hai dost-daaree kee Mubtalaa-e-shab-e-firaaq hue Zid se ham teera-rozgaaree kee Yaad aa.ee jo garm-joshee-e-yaar Deeda-e-tar ne shola-baaree kee Kyuun na Dar jaaon dekh kar wo zulf Hai shab-e-hijr kee see taareekee Yaas dekho ki ghair se kah dee Baat apnee umeed-vaaree kee Bas ki hai yaar kee kamar kaa khayaal Sher kee soojhtee hai baareekee Kar de roz-e-jazaa shab-e-deejoor Zulmat apnee siyaahkaaree kee Tere abroo kee yaad men ham ne Naakhun-e-gham se dil-figaaree kee Qatl-e-dushman kaa hai iraada use Ye sazaa apnee jaan-nisaaree kee Kya musalmaan hue ki ai 'momin' Haasil us but se sharmsaaree kee