is vusat e kalaam se ji tang aa gaya

Is vus.at-e-kalaam se jee tang aa gaya Naaseh too meree jaan na le dil gaya gaya Zid se wo phir raqeeb ke ghar men chalaa gaya Ai rashk meree jaan ga.ee teraa kya gaya Ye zof hai to dam se bhee kab tak chalaa gaya Khud-raftagee ke sadme se mujh ko ghash aa gaya Kya poochhtaa hai talkhi-e-ulfat men pand ko Aisi to lazzaten hain ki too jaan khaa gaya Kuch aankh band hote hee aankhen see khul ga.iin Jee ik balaa-e-jaan tha achchhaa huaa gaya Aankhen jo DhoonDtee thiin nigah-haa-e-iltifaat Gum honaa dil kaa wo miree nazron se paa gaya Boo-e-saman se shaad the aghyaar-e-be-tameez Us gul ko aitbaar-e-naseem-o-sabaa gaya Aah-e-sahar hamaaree falak se phiree na ho Kaisee havaa chalee ye ki jee sansanaa gaya Aatee nahin balaa-e-shab-e-gham nigaah men Kis mehr-vash kaa jalva nazar men samaa gaya Ai jazb-e-dil na tham ki na Thahraa wo shola-roo Aayaa to garm garm va-lekin jalaa gaya Mujh khaanumaan-kharaab kaa likkhaa ki jaan kar Wo naama ghair kaa mire ghar men giraa gaya Mehndee malegaa paanv se dushman to aan kar Kyuun mere tafta siine ko Thokar lagaa gaya Bosa sanam kee aankh kaa lete hee jaan dee 'momin' ko yaad kya hajrul-asvad aa gaya