juun nikhat e gul jumbish hai ji kaa nikal jaanaa

Juun nik.hat-e-gul jumbish hai jee kaa nikal jaanaa Ai baad-e-sabaa meree karvaT to badal jaanaa Paa-laghz-e-mohabbat se mushkil hai sanbhal jaanaa Us rukh kee safaa.ee par is dil kaa phisal jaanaa Siine men jo dil taDpaa dhar hee to diyaa dekhaa Phir bhuul gaya kaisaa main haath kaa phal jaanaa Itnaa to na ghabraao raahat yaheen farmaao Ghar men mire rah jaao aaj aur bhee kal jaanaa Ai dil wo jo yaan aayaa kya kya hamen tarsaayaa Too ne kaheen sikhlaayaa qaaboo se nikal jaanaa Kya aise se da.avaa ho mahshar men ki main ne to Nazzaara-e-qaatil ko ehsaan-e-ajal jaanaa Hai zulm karam jitnaa thaa farq paDaa kitnaa Mushkil hai mizaaj itnaa ik baar badal jaanaa Hooron kee sanaa-khvaanee vaa.iz yuun hee kab maanee Le aa ki hai naadaanee baaton men bahal jaanaa Ishq un kee balaa jaane aashiq hon to pahchaane Lo mujh ko atibbaa ne saude kaa khalal jaanaa Kya baaten banaataa hai wo jaan jalaataa hai Paanee men dikhaataa hai kaafoor kaa jal jaanaa Matlab hai ki vaslat men hai bul-havas aafat men Is garmi-e-sohbat men ai dil na pighal jaanaa Dam lene kee taaqat hai beemaar-e-mohabbat hai Itnaa bhee ghaneemat hai 'momin' kaa sambhal jaanaa