kartaa hai qatl e aam wo agyaar ke liye
— Momin Khan Momin
Kartaa hai qatl-e-aam wo aghyaar ke liye
Das biis roz marte hain do-chaar ke liye
Dekhaa azaab-e-ranj dil-e-zaar ke liye
'aashiq hue hain wo mire aazaar ke liye
Dil ishq teree nazr kiyaa jaan kyoonki duun
Rakkhaa hai us ko hasrat-e-deedaar ke liye
Qatl us ne jurm-e-sabr-e-jafaa par kiyaa mujhe
Ye hee sazaa thee aise gunahgaar ke liye
Le too hee bhej de koi paighaam-e-talkh ab
Tajveez zahr hai tire beemaar ke liye
Aataa nahin hai too to nishaanee hee bhej de
Taskeen-e-iztiraab-e-dil-e-zaar ke liye
Kya dil diyaa thaa is liye main ne tumhen ki tum
Ho jaao yuun 'adoo mire aghyaar ke liye
Chalnaa to dekhnaa ki qayaamat ne bhee qadam
Tarz-e-khiraam o shokhee-e-raftaar ke liye
Jee men hai motiyon kee laDee us ko bhej duun
Iz.haar-e-haal-e-chashm-e-guhar-baar ke liye
Detaa hoon apne lab ko bhee gul-barg se misaal
Bose jo khvaab men tire rukhsaar ke liye
Jiinaa umeed-e-vasl pe hijraan men sahl thaa
Martaa hoon zindagaanee-e-dushvaar ke liye
'momin' ko to na laa.e kaheen daam men wo but
DhoonDe hai taar-e-sub.ha ke zunnaar ke liye