main agar aap se jaon to qaraar aa jaae

Main agar aap se jaa.oon to qaraar aa jaa.e Par ye Dartaa hoon ki aisa na ho yaar aa jaa.e Baandho ab chaaragaro chille ki wo bhee shaayad Vasl-e-dushman ke liye soo-e-mazaar aa jaa.e Kar zaraa aur bhee ai josh-e-junoon khvaar o zaleel Mujh se aisa ho ki naaseh ko bhee aar aa jaa.e Naam-e-bad-bakhti-e-ushshaaq-e-khizaan hai bulbul Too agar nikle chaman se to bahaar aa jaa.e Jiite jee ghair ko ho aatish-e-dozakh kaa azaab Gar miree naash pe wo shola-azaar aa jaa.e Kulfat-e-hijr ko kya ro.uun tire saamne main Dil jo khaalee ho to aankhon men ghubaar aa jaa.e Mahv-e-dildaar hoon kis tarah na hoon dushman-e-jaan Mujh pe jab naaseh-e-bedard ko pyaar aa jaa.e Thahar jaa josh-e-tapish hai to taDapnaa lekin Chaarasaazon men zaraa dam dil-e-zaar aa jaa.e Husn-e-anjaam kaa 'momin' mire baare hai khayaal Yaanee kahtaa hai wo kaafir ki too maaraa jaa.e