momin khuda ke vaaste aisa makaan na chhod

'momin' khuda ke vaaste aisa makaan na chhoD Dozakh men Daal khuld ko koo-e-butaan na chhoD Aashiq to jaante hain wo ai dil yahee sahee Har-chand be-asar hai par aah o fughaan na chhoD Us tab-e-naazneen ko kahaan taab-e-infi.aal Jaasoos mere vaaste ai bad-gumaan na chhoD Naa-chaar denge aur kisee khoob-roo ko dil Achchhaa too apnee khoo-e-bad ai bad-zabaan na chhoD Zakhmee kiyaa udoo ko to marnaa muhaal hai Qurbaan jaa.oon tere mujhe neem-jaan na chhoD Kuch Kuch durust zid se tiree ho chale hain wo Yak-chand aur kaj-ravee ai aasmaan na chhoD Jis kooche men guzaar sabaa kaa na ho sake Ai andaleeb us ke liye gulsitaan na chhoD Gar phir bhee ashk aa.en to jaanoon ki ishq hai Huqqe kaa munh se ghair kee jaanib dhuaan na chhoD Hota hai is jaheem men haasil visaal-e-jaur 'momin' ajab bahisht hai dair-e-mughaan na chhoD