shab tum jo bazm e gair men aankhen churaa gae

Shab tum jo bazm-e-ghair men aankhen churaa ga.e Kho.e ga.e ham aise ki aghyaar paa ga.e Poochhaa kisee pe marte ho aur dam nikal gaya Ham jaan se inaan-ba-inaan-e-sadaa ga.e Phailee wo boo jo ham men nihaan misl-e-ghuncha thee Jhonke naseem ke ye nayaa gul khilaa ga.e Ai aab-e-ashk aatish-e-unsur hai dekhnaa Jee hee gaya agar nafas-e-shola-zaa ga.e Majlis men us ne paan diyaa apne haath se Aghyaar sabz-bakht the ham zahr khaa ga.e UTThaa na zof se gul-e-daagh-e-junoon kaa bojh Qaaroon kee tarah ham bhee zameen men samaa ga.e Ghairon se ho wo parda-nasheen kyuun na be-hijaab Dam-haa-e-be-asar mire parda uThaa ga.e Thee bad-gumaanee ab unhen kya ishq-e-hoor kee Jo aa ke marte dam mujhe soorat dikhaa ga.e Taabinda o javaan to bakht-e-raqeeb the Ham teera-roz kyuun gham-e-hijraan ko bhaa ga.e Be-zaar zindagaanee kaa jiinaa muhaal thaa Wo bhee hamaaree na.ash ko Thokar lagaa ga.e Vaa.iz ke zikr-e-mehr-e-qayaamat ko kya kahoon Aalam shab-e-visaal ke aankhon men chhaa ga.e Jis vaqt us dayaar se aghyaar-e-bul-havas Bad-khooiyon se yaar ke ho kar khafaa ga.e Dunya hee se gaya main joonhee naaz se kahaa Ab bhee gumaan-e-bad na ga.e tere yaa ga.e Ai 'momin' aap kab se hue banda-e-butaan Baare hamaare diin men hazrat bhee aa ga.e