thaanii thii dil men ab na milenge kisi se ham

Thaanee thee dil men ab na milenge kisee se ham Par kya karen ki ho ga.e naa-chaar jee se ham Hanste jo dekhte hain kisee ko kisee se ham Munh dekh dekh rote hain kis be-kasee se ham Ham se na bolo tum ise kya kahte hain bhalaa Insaaf kiije poochhte hain aap hee se ham Be-zaar jaan se jo na hote to maangte Shaahid shikaayaton pe tiree mudda.ee se ham Us koo men jaa marenge madad ai hujoom-e-shauq Aaj aur zor karte hain be-taaqatee se ham Saahab ne is ghulaam ko aazaad kar diyaa Lo bandagee ki chhooT ga.e bandagee se ham Be-ro.e misl-e-abr na niklaa ghubaar-e-dil Kahte the un ko barq-e-tabassum hansee se ham In naa-tavaaniyon pe bhee the khaar-e-raah-e-ghair Kyuun kar nikaale jaate na us kee galee se ham Kya gul khilegaa dekhiye hai fasl-e-gul to duur Aur soo-e-dasht bhaagte hain Kuch abhee se ham Munh dekhne se pahle bhee kis din wo saaf thaa Be-vaj.h kyuun ghubaar rakhen aarsee se ham Hai chheD ikhtilaat bhee ghairon ke saamne Hansne ke badle ro.en na kyuun gudgudee se ham Vahshat hai ishq-e-parda-nasheen men dam-e-bukaa Munh Dhaankte hain parda-e-chashm-e-paree se ham Kya dil ko le gaya koi begaana-aashnaa Kyuun apne jee ko lagte hain Kuch ajnabee se ham Le naam aarzoo kaa to dil ko nikaal len 'momin' na hon jo rabt rakhen bid.atee se ham