waada e vaslat se dil ho shaad kya

Waada-e-vaslat se dil ho shaad kya Tum se dushman kee mubaarakbaad kya Kuch qafas men in dinon lagtaa hai jee Aashiyaan apna huaa barbaad kya Naala-e-paiham se yaan fursat naheen Hazrat-e-naaseh karen irshaad kya Hain asiir us ke jo hai apna asiir Ham na samjhe said kya sayyaad kya Shokh-baazaaree thee sheereen bhee magar Varna farq-e-khusrau-o-farhaad kya Nashsha-e-ulfat se bhoole yaar ko Sach hai aisee be-khudee men yaad kya Naala ik dam men uDaa Daale dhuen Charkh kya aur charkh kee buniyaad kya Jab mujhe ranj-e-dil-aazaaree na ho Bevafaa phir haasil-e-bedaad kya Paanv tak pahunchee wo zulf-e-kham-ba-kham Sarv ko ab baandhiye aazaad kya Kya karoon allaah sab hain be-asar Valvala kya naala kya fariyaad kya In naseebon par kiyaa akhtar-shanaas Aasmaan bhee hai sitam-eejaad kya Roz-e-mahshar kee tavaqqo hai abas Aisee baaton se ho khaatir shaad kya Gar bahaa-e-khoon-e-aashiq hai visaal Intiqaam-e-zahmat-e-jallaad kya But-kada jannat hai chaliye be-hiraas Lab pe 'momin' harche baadaa-baad kya