vaade ki jo saaat dam e kushtan hai hamaaraa

Vaade kee jo saa.at dam-e-kushtan hai hamaaraa Jo dost hamaaraa hai so dushman hai hamaaraa Ye kaah-e-rubaa se bhee hain kam ai kashish-e-dil Mazkoor Kuch aisa pas-e-chilman hai hamaaraa Afsos moo-e-sham-e-shab-e-vasl kee maanind Jo qahqaha shaadee hai so shevan hai hamaaraa Mahtaab kaa kya rang kiyaa dood-e-fughaan ne Ahvaal shab-e-taar se raushan hai hamaaraa Deta nahin us zof pe bhee josh-e-junoon chain Har reg-e-ravaan dasht men tausan hai hamaaraa Tafreeh na kyoonkar ho havaa aa nahin saktee Goyaa dar o deevaar nasheman hai hamaaraa Gar paas hai logon kaa to aa jaa ki qalaq se Hai laash kaheen aur kaheen madfan hai hamaaraa Jazb-e-dil use kheench ke laa.e to kahaan laa.e Jo ghair kaa ghar hai vahee maskan hai hamaaraa But-khaane se kaabe ko chale rashk ke maare 'momin' khizr-e-raah barhaman hai hamaaraa