Acchi se Acchi aab o havaa ke bagair bhi
— Munawwar Rana
Achchhee se achchhee aab-o-havaa ke baghair bhee
Zinda hain kitne log davaa ke baghair bhee
Saanson kaa kaarobaar badan kee zarooraten
Sab Kuch to chal raha hai duaa ke baghair bhee
Barson se is makaan men rahte hain chand log
Ik doosre ke saath wafa ke baghair bhee
Ab zindagee kaa koee bharosa naheen raha
Marne lage hain log qazaa ke baghair bhee
Ham be-qusoor log bhee dilchasp log hain
Sharminda ho rahe hain khataa ke baghair bhee
Chaaragaree bataa.e agar Kuch ilaaj hai
Dil TooTne lage hain sadaa ke baghair bhee