hanste hue maan baap ki gaalii nahin khaate
— Munawwar Rana
Hanste hue maan-baap kee gaalee naheen khaate
Bachche hain to kyuun shauq se miTTee naheen khaate
Tum se naheen milne kaa iraada to hai lekin
Tum se na milenge ye qasam bhee naheen khaate
So jaate hain fotpath pe akhbaar bichhaa kar
Mazdoor kabhee niind kee golee naheen khaate
Bachche bhee ghareebee ko samajhne lage shaayad
Ab jaag bhee jaate hain to saharee naheen khaate
Daavat to baDee chiiz hai ham jaise qalandar
Har ek ke paison kee davaa bhee naheen khaate
Allaah ghareebon kaa madad-gaar hai 'raanaa'
Ham logon ke bachche kabhee sardee naheen khaate