kabhi khushii se khushii ki taraf nahin dekhaa
— Munawwar Rana
Kabhi khushee se khushee kee taraf nahin dekhaa
Tumhaare ba.ad kisee kee taraf nahin dekhaa
Ye soch kar ki tiraa intizaar laazim hai
Tamaam-umr ghaDee kee taraf nahin dekhaa
Yahaan to jo bhee hai aab-e-ravaan kaa aashiq hai
Kisee ne khushk nadee kee taraf nahin dekhaa
Wo jis ke vaaste pardes jaa raha hoon main
BichhaDte vaqt usee kee taraf nahin dekhaa
Na rok le hamen rotaa huaa koi chehra
Chale to muD ke galee kee taraf nahin dekhaa
BichhaDte vaqt bahut mutma.in the ham donon
Kisee ne muD ke kisee kee taraf nahin dekhaa
Ravish buzurgon kee shaamil hai meree ghuTTee men
Zarooratan bhee sakhee kee taraf nahin dekhaa