kisi ghareeb ki barson ki aarzoo ho jaon
— Munawwar Rana
Kisee ghareeb kee barson kee aarzoo ho jaa.oon
Main is surang se nikloon to aab-joo ho jaa.oon
BaDaa haseen taqaddus hai us ke chehre par
Main us kee aankhon men jhaankoon to baa-vazoo ho jaa.oon
Mujhe pata to chale mujh men aib hain kya kya
Wo aa.ina hai to main us ke roo-ba-roo ho jaa.oon
Kisee tarah bhee ye veeraaniyaan hon khatm miree
Sharaab-khaane ke andar kee haav-hoo jaa.oon
Miree hathelee pe honTon se aisee mohr lagaa
Ki umr-bhar ke liye main bhee surkh-roo ho jaa.oon
Kamee zaraa see bhee mujh men na koee rah jaa.e
Agar main zakhm kee soorat hoon to rafoo ho jaa.oon
Na.e mizaaj ke shahron men jee naheen lagtaa
Puraane vaqton kaa phir se main lucknow ho jaa.oon