main is se pahle ki bikhruun idhar udhar ho jaon
— Munawwar Rana
Main is se pahle ki bikhroon idhar udhar ho jaaon
Mujhe sambhaal le mumkin hai dar-ba-dar ho jaaon
Ye aab-o-taab jo mujh men hai sab usee se hai
Agar wo chhoD de mujh ko to main khanDar ho jaaon
Miree madad se khujooron kee fasl pakne lage
Main chaahtaa hoon ki sahraa kee dopahar ho jaaon
Main aas-paas ke mausam se hoon tar-o-taaza
Main apne jhunD se nikloon to be-samar ho jaaon
BaDee ajiib see hiddat hai us kee yaadon men
Agar main chhoo luun paseene se tar-ba-tar ho jaaon
Main kachchee miTTee kee soorat hoon tere haathon men
Mujhe too Dhaal de aise ki mo'atabar ho jaaon
Bachee-khuchee huee saanson ke saath pahunchaanaa
Suno havaao agar main shikasta-par ho jaaon