mittii men milaa de ki judaa ho nahin saktaa

MiTTee men milaa de ki judaa ho naheen saktaa Ab is se ziyaada main tiraa ho naheen saktaa Dahleez pe rakh dee hain kisee shakhs ne aankhen Raushan kabhee itnaa to diyaa ho naheen saktaa Bas too miree awaaz se awaaz milaa de Phir dekh ki is shahr men kya ho naheen saktaa Ai maut mujhe too ne museebat se nikaalaa Sayyaad samajhtaa thaa rihaa ho naheen saktaa Is khaak-e-badan ko kabhee pahunchaa de vahaan bhee Kya itnaa karam baad-e-sabaa ho naheen saktaa Peshaanee ko sajde bhee ataa kar mire maulaa Aankhon se to ye qarz adaa ho naheen saktaa Darbaar men jaanaa miraa dushvaar bahut hai Jo shakhs qalandar ho gadaa ho naheen saktaa