pairon ko mire diida e tar baandhe hue hai

Pairon ko mire deeda-e-tar baandhe hue hai Zanjeer kee soorat mujhe ghar baandhe hue hai Har chehre men aataa hai nazar ek hee chehraa Lagtaa hai koi meree nazar baandhe hue hai BichhDenge to mar jaa.enge ham donon bichhaD kar Ik Dor men ham ko yahee Dar baandhe hue hai Parvaaz kee taaqat bhee nahin baaqee hai lekin Sayyaad abhee tak mire par baandhe hue hai Ham hain ki kabhi zabt kaa daaman nahin chhoDaa Dil hai ki dhaDakne pe kamar baandhe hue hai Aankhen to use ghar se nikalne nahin deteen Aansoo hai ki saamaan-e-safar baandhe hue hai Phenkee na 'munavvar' ne buzurgon kee nishaanee Dastaar puraanee hai magar baandhe hue hai