saarii daulat tire qadmon men padii lagtii hai
— Munawwar Rana
Saaree daulat tire qadmon men paDee lagtee hai
Too jahaan hota hai qismat bhee gaDee lagtee hai
Aise royaa tha bichhaDte hue wo shakhs kabhi
Jaise saavan ke maheene men jhaDee lagtee hai
Ham bhee apne ko badal Daalenge rafta rafta
Abhee dunya hamen jannat se baDee lagtee hai
Khushnumaa lagte hain dil par tire zakhmon ke nishaan
Beach deevaar men jis tarah ghaDee lagtee hai
Too mire saath agar hai to andheraa kaisaa
Raat khud chaand sitaaron se jaDee lagtee hai
Main rahoon yaa na rahoon naam rahegaa meraa
Zindagee umr men kuch mujh se baDee lagtee hai