sahraa pe buraa vaqt mire yaar padaa hai
— Munawwar Rana
Sahraa pe buraa vaqt mire yaar paDaa hai
Deevaana ka.ee roz se beemaar paDaa hai
Sab raunaq-e-sahraa thee isee pagle ke dam se
UjDaa huaa deevaane kaa darbaar paDaa hai
Aankhon se Tapaktee hai vahee vahshat-e-sahraa
Kaandhe bhee bataate hain baDaa baar paDaa hai
Dil men jo lahoo-jheel thee wo suukh chukee hai
Aankhon kaa do-aabaa hai so be-kaar paDaa hai
Tum kahte the din ho ga.e dekhaa naheen us ko
Lo dekh lo ye aaj kaa akhbaar paDaa hai
ODhe hue ummeed kee ik mailee see chaadar
Darvaaza-e-bakhshish pe gunahgaar paDaa hai
Ai khaak-e-vatan tujh se main sharminda bahut hoon
Mahngaa.ee ke mausam men ye tyauhaar paDaa hai