ye but jo ham ne dobaara banaa ke rakkhaa hai
— Munawwar Rana
Ye but jo ham ne dobaara banaa ke rakkhaa hai
Isee ne ham ko tamaashaa banaa ke rakkhaa hai
Wo kis tarah hamen in.aam se navaazegaa
Wo jis ne haathon ko kaasa banaa ke rakkhaa hai
Yahaan pe koi bachaane tumhen na aa.egaa
Samundaron ne jazeera banaa ke rakkhaa hai
Tamaam umr kaa haasil hai ye hunar meraa
Ki main ne sheeshe ko hiiraa banaa ke rakkhaa hai
Kise kise abhee sajda-guzaar honaa hai
Ameer-e-shahr ne khaataa banaa ke rakkhaa hai
Main bach gaya to yaqeenan ye mo.ajiza hogaa
Sabhee ne mujh ko nishaana banaa ke rakkhaa hai
Koi bataa de ye sooraj ko jaa ke ham ne bhee
Shajar ko dhoop men chhaataa banaa ke rakkhaa hai