aag se sairaab dasht e zindagaanii ho gaya
— Muzaffar Warsi
Aag se sairaab dasht-e-zindagaanee ho gaya
Sho.ala-e-dil aankh men aayaa to paanee ho gaya
Dard siine men uThaa maathe pe shiknen paD ga.iin
Rang chehre kaa sadaa-e-be-zabaanee ho gaya
Teree aankhen aa.ina haathon men le kar aa ga.iin
Roo-ba-roo ho kar tire main apnaa saanee ho gaya
Jab bhaDak uTThaa thaa tere qurb se meraa badan
Naam un hassaas lamhon kaa javaanee ho gaya
Kar diyaa thaa main ne jo aavaara patton par raqam
Raaz wo rusvaa havaaon kee zabaanee ho gaya
Ek an-miT raushnee thaa arsh kee mehraab par
Aadmee ke ruup men aa kar main faanee ho gaya
Jin ke seenon men dhaDaktaa thaa 'muzaffar' meraa dil
Aaj main un ke liye bhoolee kahaanee ho gaya