ab ke barsaat kii rut aur bhii bhadkiilii hai

Ab ke barsaat kee rut aur bhee bhaDkeelee hai Jism se aag nikaltee hai qabaa giilee hai Sochtaa huun ki ab anjaam-e-safar kya hogaa Log bhee kaanch ke hain raah bhee pathreelee hai Shiddat-e-karb men hansnaa to hunar hai meraa Haath hee sakht hain zanjeer kahaan Dheelee hai Gard aankhon men sahee daagh to chehre pe nahin Lafz dhundle hain magar fikr to chamkeelee hai Ghol detaa hai samaa'at men wo meeThaa lahja Kis ko maa'loom ki ye qand bhee zahreelee hai Pahle rag rag se miree khuun nichoDaa us ne Ab ye kahtaa hai ki rangat hee miree piilee hai Mujh ko be-rang hee kar den na kaheen rang itne Sabz mausam hai havaa surkh fazaa niilee hai Meree parvaaz kisee ko nahin bhaatee to na bhaa.e Kya karoon zehn 'muzaffar' miraa jibreelee hai