dil ho hassaas to jiine men bahut ghaataa hai
— Muzaffar Warsi
Dil ho hassaas to jiine men bahut ghaaTaa hai
Main ne khud apne hee zakhmon kaa lahoo chaaTaa hai
Mujh pe ehsaan hai miree tesha-ba-kaf saanson kaa
Zindagee tujh ko pahaaDon kee tarah kaaTaa hai
Duub kar dekh samundar huun main aavaazon kaa
Taalib-e-husn-e-samaa.at miraa sannaaTaa hai
Main chaTaanon kee tarah jin kee kameen-gaah banaa
Rafta rafta unheen lahron ne mujhe chaaTaa hai
Mar chukaa huun main ka.ee baar jahaan ke haathon
Apnee laashon se 'muzaffar' ye kuaan paaTaa hai