gahraaiyon men zehn kii girdaab saa rahaa
— Muzaffar Warsi
Gahraa.iyon men zehn kee girdaab saa rahaa
Saahil pe bhee khaDaa huaa gharqaab saa rahaa
Be-naam see ik aag jalaatee rahee mujhe
Khuun ke bajaa.e jism men tezaab saa rahaa
Khaalee vajood hee liye phirtaa rahaa magar
Kaandhon pe umr bhar mire asbaab saa rahaa
Naghme bikhertaa rahaa ehsaas-e-talkh bhee
Khaama bhee mere haath men mizraab saa rahaa
Ashkon men us ke husn kee lau tairtee rahee
Paanee ke aasmaan pe mahtaab saa rahaa
Kaam aa.ee shaa.iree bhee 'muzaffar' ke kis qadar
Tanhaa.ee men bhee majma-e-ahbaab saa rahaa