ham karen baat daliilon se to radd hotii hai
— Muzaffar Warsi
Ham karen baat daleelon se to rad hotee hai
Us ke honTon kee khamoshee bhee sanad hotee hai
Saans lete hue insaan bhee hain laashon kee tarah
Ab dhaDakte hue dil kee bhee lahad hotee hai
Jis kee gardan men hai phandaa vahee insaan baDaa
Sooliyon se yahaan paimaa.ish-e-qad hotee hai
Sho.abda-gar bhee pahante hain khateebon kaa libaas
Boltaa jahl hai bad-naam khirad hotee hai
Kuchh na kahne se bhee chhin jaataa hai ejaaz-e-sukhan
Zulm sahne se bhee zaalim kee madad hotee hai