khud mirii aankhon se ojhal merii hasti ho gaii

Khud miree aankhon se ojhal meree hastee ho ga.ee Aa.ina to saaf hai tasveer dhundlee ho ga.ee Saans letaa huun to chubhtee hain badan men haDDiyaan Ruuh bhee shaayad miree ab mujh se baaghee ho ga.ee Faash kar diin main ne khud andar kee be-tarteebiyaan Zindagee aaraa.ishon men aur nangee ho ga.ee Pyaar kartee hain mire raston se kya kya bandishen ToD dee zanjeer to deevaar oonchee ho ga.ee Meree jaanib aa.e pas-manzar se patthar be-shumaar Rang-e-duniyaa dekh kar beenaa.ee zakhmee ho ga.ee PaD gaya parda samaa.at par tiree aavaaz kaa Ek aahaT kitne hangaamon pe haavee ho ga.ee Kar gaya hai mubtalaa-e-karb aur ik saaneha Aur kuchh din zinda rehne kee talaafee ho ga.ee Khvaahishon kee aag bhee bhaDkaa.egee ab kya mujhe Raakh bhee meree 'muzaffar' ab to ThanDee ho ga.ee