kuchh aisa utraa main us sang dil ke shiishe men
— Muzaffar Warsi
Kuchh aisa utraa main us sang-dil ke sheeshe men
Ki chand saans bhee aa.e na apne hisse men
Wo ek aise samundar ke ruup men aayaa
Ki umr kaT ga.ee jis ko ubuur karne men
Mujhe khud apnee talab kaa nahin hai andaaza
Ye kaa.enaat bhee thoDee hai mere kaase men
Milee to hai miree tanhaa.iyon ko aazaadee
JuDee huee hain kuchh aankhen magar dareeche men
Ghaneem bhee koi mujh ko nazar nahin aataa
Ghiraa huaa bhee huun chaaron taraf se khatre men
Miraa shu.oor bhee shaayad wo tifl-e-kam-sin hai
BichhaD gaya hai jo gumraahiyon ke mele men
Hunar hai shaa.iree shatranj shauq hai meraa
Ye jaa.idaad 'muzaffar' milee hai virse men