main hare mausamon men jaltaa rahaa
— Muzaffar Warsi
Main hare mausamon men jaltaa rahaa
Khushbuon se dhuaan nikaltaa rahaa
Aag par honT rakh diye the kabhi
Aakhiree saans tak pighaltaa rahaa
Main akelaa bhee kaarvaan kee tarah
Raaston ke baghair chaltaa rahaa
Haadse mujh ko pesh aate rahe
Aur zamaane kaa jee bahaltaa rahaa
Meree aavaaz munharif na huee
Vaqt kaa faisla badaltaa rahaa
Zindagee mujh ko qatl kartee rahee
Maut kee vaadiyon men paltaa rahaa
Kaarobaar-e-sukhan kiyaa main ne
Yaa 'muzaffar' lahoo ugaltaa rahaa