muntazir rahnaa bhii kya chaahat kaa khamyaaza nahiin

Muntazir rahnaa bhee kya chaahat kaa khamyaaza nahin Kaan dastak par lage hain ghar kaa darvaaza nahin Haath par too ne muqaddar kee lakeeren kheench diin Kya tujhe bhee mere mustaqbil kaa andaaza nahin Dekhnaa chaahoon to khushboo, chhoonaa chaahoon to havaa Mere daaman tak jo aa.e too wo sheeraaza nahin Dafan huun ehsaas kee sadiyon puraanee qabr men Zindagee ik zakhm hai aur zakhm bhee taaza nahin Tum hee ai khaamoshiyo patthar uThaa lo haath men Koi naghma koi naala koi aavaaza nahin Husn pahchaanegee meraa dekhne vaalee nazar Khuun to hai aankhon men chehre par agar ghaaza nahin Maangte hain kyuun 'muzaffar' log baarish kee duaa Tishnagee-e-rooh kaa jismon ko andaaza nahin