naqsh dil par kaisii kaisii suuraton kaa rah gaya
— Muzaffar Warsi
Naqsh dil par kaisee kaisee sooraton kaa rah gaya
Kitnee lahren ham-safar thiin phir bhee pyaasaa rah gaya
Kaisee kaisee khvaahishen mujh se judaa hotee ga.iin
Kis qadar aabaad thaa aur kitnaa tanhaa rah gaya
DhoonDne niklaa thaa aavaazon kee bastee men use
Soch kar veeraan guzargaahon pe baiThaa rah gaya
Us se milnaa yaad hai mil kar bichhaDnaa yaad hai
Kya bataa saktaa huun kya jaataa rahaa kya rah gaya
Main ye kahtaa huun ki har rukh se basar kee zindagee
Zindagee kahtee hai har pahloo adhooraa rah gaya
Ahd-e-rafta kee khudaa.ee kis qadar mahngee paDee
Jis jagah oonchee imaarat thee gaDhaa saa rah gaya
Sirf itnee hai 'muzaffar' apnee roodaad-e-hayaat
Main zamaane ko zamaana mujh ko taktaa rah gaya