nikhar sakaa na badan chaandnii men sone se
— Muzaffar Warsi
Nikhar sakaa na badan chaandnee men sone se
Sahar huee to kharaashen chuneen bichhaune se
Sadaf liye hue ubhree hai laash bhee meree
Bachaa rahe the mujhe log gharq hone se
Hunar hai tujh men to qaa.il bhee kar zamaane ko
Chamak uThegee na shakl aa.ine ko dhone se
LipaT rahee hain mire raaston se raushaniyaan
Nazar men log hain kuchh saanvle salone se
Lagaa ke zakhm bahaane chalaa hai ab aansoo
Rukaa hai khuun kaheen paTTiyaan bhigone se
Hameen na hon kaheen dekho to ghaur se logo
Hain tifl-e-vaqt ke haathon men kuchh khilaune se
Mire dukhon se bhee kuchh faa.eda uThaa duniyaa
Zameen kee pyaas bujhe baadalon ke rone se
Lahoo ragon men 'muzaffar' chhuDaa.e mahtaabee
Mile hai kya use chingaariyaan chubhone se