patthar mujhe sharminda e guftaar na kar de
— Muzaffar Warsi
Patthar mujhe sharminda-e-guftaar na kar de
Oonchaa miree aavaaz ko deevaar na kar de
Majboor-e-sukhan kartaa hai kyuun mujh ko zamaana
Lahja mire jazbaat kaa iz.haar na kar de
Zanjeer samajh kar mujhe toDaa to hai too ne
Ab tujh ko pareshaan miree jhankaar na kar de
Chaltaa huun to paDte hain qadam mere havaa par
Dartaa huun havaa chalne se inkaar na kar de
Rah jaa.oon na main apne hee qadmon se kuchal kar
Paamaal mujhe khud miree raftaar na kar de
Main khud ko miTaa kar tiraa shahkaar banaa huun
Neelaam mujhe too sar-e-baazaar na kar de
Har saans na.e zakhm lagaatee hai 'muzaffar'
TukDe mire ik roz ye talvaar na kar de